ບໍຣິຈາກ ຫ້ອງນີ້ສ້າງຕັ້ງຂຶ້ນວັນທີ 26 ເມສາ ປີ 2012 ໂດຍບໍ່ຫວັງຜົນກຳໄລ ຫວັງພຽງຢາກເກັບກຳ-ຮິບໂຮມ ທຸກສິ່ງຢ່າງທີ່ກ່ຽວກັບເຊື້ອຊາດ ແລະວັທນະທັມລາວເພື່ອອະນຸຮັກ-ປົກປັກຮັກສາ-ສົ່ງເສີມ-ເຜີຍແຜ່... ແລະເປັນແຫລ່ງຂຸມຊັບຂອງຂໍ້ມູນທັງຫລາຍ ສຳລັບການຄົ້ນຄວ້າ ແລະການຮຽນຮູ້ ແກ່ປັນຍາຊົນແລະຜູ່ໄຝຢາກຈະຮູ້ທຸກທົ່ວໜ້າ.
ໃນເດືອນມິຖຸນາຂອງປີ 2020 ພວກເຮົາໄດ້ປັບປ່ຽນແລະປັບປຸງລະບົບການເຮັດວຽກທຸກຢ່າງ ເພື່ອສແວງຫາທຶນຮອນ ພາຍໃຕ້ເປົ້າໝາຍ ທີ່ຢາກຈະສ້າງຕັ້ງແລະເຜີຍແຜ່ ຄວາມຄິດຂອງໂຮງຮຽນເອກກະຊົນ ກິນນອນບໍ່ເສັຽຄ່າ “ໄດ້ບຸນ 24/7”. ໂດຍມີເປົ້າໝາຍ ຢາກອຸປຖັມແລະຊ່ອຍເຫລືອເດັກນ້ອຍລາວຜູ່ດ້ອຍໂອກາດ ທີ່ອ່ານບໍ່ອອກຂຽນບໍ່ໄດ້ ໃຫ້ມີທີ່ພັກເຊົາ ມີບ່ອນໄດ້ຮ່ຳໄດ້ຮຽນ ເພື່ອສາມາດອ່ານອອກຂຽນໄດ້ ພ້ອມໄດ້ຝຶກຝົນສີໄມ້ລາຍມື ໃຫ້ມີອາຊີບທຳມາຫາກິນພື້ນຖານ ເພື່ອການສ້າງອາຊີບແລະອະນາຄົດໃຫ້ຕົນເອງ ໃນພາຍພາກໜ້າ.